అమ్మతనం (గర్భం) అపోహల వెనుక ఉన్న అసలు నిజం - The Truth Behind Popular Pregnancy Misconceptions

గర్భధారణ అనేది జీవితంలో జరిగే ఒక గొప్ప సంఘటన. తమ వారసులను తమ గర్భంలో దాల్చడమన్నది నూతన, యువ జంటలకు అద్భుతమైన ఆనందాన్ని అందించే సంఘటన. గర్భాధారణ జరిగింది అన్న వార్తతో వారి సంతోషానికి అవధులు ఉండవు. వారే కాదు వారితో పాటు అటు అబ్బాయి సహా అమ్మాయి కుటుంబాలలోనూ పెద్ద పండుగ వాతావరణమే అలుముకుంటుంది. అయితే ఈ సమయంలో, గర్భం దాల్చిన మహిళలకు తినే ఆహారం మొదలుకుని ఇది చేయవద్దు.. అది చేయవద్దు అంటూ ఆంక్షలు మొదలవుతాయి. వీటిలో చాలా వరకు వాస్తవంగా సైన్స్ చెప్పే నిజాల కంటే పాతకాలపు మూఢనమ్మకాలపై ఆధారపడి ఈ ఆంక్షలు ఉంటాయి. మీరు కాఫీ తాగడం మానేయాలని చెప్పినా లేదా మీ పొట్ట ఆకారం భవిష్యత్తును అంచనా వేయగలదని చెప్పినా వాటిని నమ్మకండి.

వైద్యం అనేది అందుబాటులో లేని పాతకాతంలో పుట్టుకోచ్చిన కల్పనల నుండి శరవేగంగా అభివృద్ది చెందుతున్న ఆధునాతన వైద్యపరమైన వాస్తవాలను తెలుసుకోవాల్సిన సమయం ఇది. చాలా మంది గర్భధారణకు సంబంధించిన సలహాలు లేదా సమాచారాన్ని విని ఉంటారు. ఇది తరచుగా వివిధ లక్షణాల అర్థం, పుట్టబోయే బిడ్డ ఆడో మగో ఎలా తెలుసుకోవాలి, మరియు గర్భధారణ సమయంలో ఒక మహిళ ఏమి చేయవచ్చు మరియు ఏమి చేయకూడదు అనే విషయాలపై దృష్టి పెడుతుంది. కొన్ని సమాచారాలు, ముఖ్యంగా వైద్య నిపుణుల నుండి వచ్చేవి, కచ్చితమైనవి మరియు సహాయకరమైనవి. అయినప్పటికీ, గర్భధారణ గురించి చాలా అపోహలు ప్రచారంలో ఉన్నాయి. ఇక్కడ, మనం కొన్ని ప్రసిద్ధ అపోహలను పరిశీలించి, వాటి వెనుక ఉన్న నిజాన్ని వివరిస్తాము.

1. కౌమార గర్భాలు పెరుగుతున్నాయా?     Teen pregnancy is on the rise

వాస్తవానికి, యునైటెడ్ స్టేట్స్‌లో కౌమార గర్భాల రేటు నెమ్మదిగా తగ్గుతోంది. గర్భనిరోధక సాధనాల వాడకం పెరగడమే ఈ తగ్గుదలకు ప్రధాన కారణమని పరిశోధనలు సూచిస్తున్నాయి. సెంటర్స్ ఫర్ డిసీజ్ కంట్రోల్ అండ్ ప్రివెన్షన్ (CDC) ప్రకారం, 2017లో, 15 నుండి 19 సంవత్సరాల వయస్సు గల కౌమార బాలికలలో నమోదైన గర్భాల సంఖ్య 194,377. ఈ మొత్తం 2016 నుండి 7 శాతం తగ్గింది. ఇటు మన దేశంలోనూ ఈ రేటు క్రమంగా తగ్గుముఖం పడుతొంది. 2019-21 డేటా ప్రకారం మన దేశంలో 15 నుండి 19 సంవత్సరాల మధ్య కౌమార దశలో గర్భం దాల్చిన యువతులు 6.8 శాతంగా ఉన్నారు. దేశంలోని త్రిపుర, పశ్చిమ బెంగాల్, బిహార్ వంటి రాష్ట్రాల్లో బాల్య వివాహాలు, పేదరికం, నిరక్షరాస్యత, మూడ విశ్వాసాల కారణంగా ఈ కౌమార గర్భాలు నమోదు అవుతున్నాయి.

2. కవల గర్భాలు అరుదా?          Twin pregnancies are rare

కవల గర్భాలు ప్రజలు అనుకున్నదానికంటే సర్వసాధారణం. సెంటర్స్ ఫర్ డిసీజ్ కంట్రోల్ అండ్ ప్రివెన్షన్ (CDC) ప్రకారం, 2017లో సుమారుగా 128,310 కవల శిశువులు జన్మించారు. అమెరికాలో ప్రతి 1,000 జననాలలో దాదాపు 33 కవలలే ఉంటారు. ఇటు భారతదేశంలోనూ కవల గర్భాలు అరుదు కాదు, కాబట్టి ఈ వాదన ఒక అపోహ. వాస్తవానికి కవల జననాల సంభవం మన దేశంలో గత రెండు దశాబ్దాలుగా పెరుగుతోంది, ఇది ప్రతి 1,000 జననాలకు సుమారుగా 9-16కి, లేదా ప్రతి 250 గర్భాలలో ఒకరు కవలలను జన్మనిస్తున్నారు. దీనికి ప్రధాన కారణాలు తల్లి వయస్సు పెరగడం మరియు IVF వంటి సహాయక పునరుత్పత్తి సాంకేతికతల (ART) వాడకం.

3. గుండెల్లో మంట.. బిడ్డ వత్తైన జుట్టుకు సంబంధ:?          Heartburn means that the baby will have a lot of hair

ఇది నిజమో కాదో నిర్ధారించడానికి పరిమితమైన ఆధారాలు మాత్రమే ఉన్నాయి. 2006లో జరిగిన ఒక చిన్న అధ్యయనంలో, మధ్యస్థం నుండి తీవ్రమైన గుండెల్లో మంటను అనుభవిస్తున్నట్లు నివేదించిన 28 మందిలో 23 మందికి పుట్టిన పిల్లలకు సగటు లేదా సగటు కంటే ఎక్కువ జుట్టు ఉన్నట్లు కనుగొన్నారు. గర్భధారణ హార్మోన్ల వల్ల జుట్టు పెరుగుదల, అలాగే అన్నవాహికను (ఆహార నాళం) కడుపు నుండి వేరుచేసే కండరాలు సడలడం వంటివి ప్రభావితం కావడం గుండెల్లో మంటకు కారణం కావచ్చని పరిశోధకులు సూచించారు. కాగా, తాజా అధ్యయనాలు ఒక సంభావ్య సంబంధాన్ని సూచిస్తున్నాయి. అధిక స్థాయి ఈస్ట్రోజెన్/ప్రొజెస్టెరాన్ గుండెల్లో మంటను కలిగించడమే కాకుండా పిండం యొక్క వెంట్రుకల పెరుగుదలకు కూడా దోహదం చేస్తాయని పేర్కొన్నాయి. కాగా, ఇది పరిమిత అధ్యయన మాత్రమే, దీనిపై మరిన్ని అధ్యయనాల ఫలితాల కోసం వేచి చూడాల్సిందే.

4. బిడ్డ లింగాన్ని అంచనా వేయవచ్చా?     It is possible to predict the sex of the baby

బిడ్డ లింగాన్ని అంచనా వేయడానికి ప్రజలు అనేక విభిన్న పద్ధతులను ప్రతిపాదిస్తున్నారు. గర్భిణీ మహిళ ముఖం లేదా పొట్ట ఆకారాన్ని బట్టి శిశువు లింగాన్ని అంచనా వేయడం నుండి, గర్భణీ మహిళ ఒక దారానికి పెళ్లి ఉంగరాన్ని కట్టి పొట్టపై పట్టుకున్నప్పుడు అది ఎలా తిరుగుతుందో చూడటం వరకు ఈ పద్ధతులు ఉంటాయి. పొట్ట ఆకారం, కోరికలు, హృదయ స్పందన రేటు వంటివి ఉపయోగించి శిశువు యొక్క లింగాన్ని అంచనా వేయడం నిజానికి ఊహ మాత్రమే. ఎందుకంటే ఈ పాతకాలపు మూఢనమ్మకాలకు శాస్త్రీయ ఆధారాలు లేవు. ఈ పద్ధతులలో ఏవీ కూడా శిశువు లింగాన్ని ఖచ్చితంగా సూచించవు. అల్ట్రాసౌండ్, NIPT (నాన్-ఇన్వాసివ్ ప్రినేటల్ టెస్టింగ్), లేదా జన్యు పరీక్ష (CVS/అమ్నియోసెంటెసిస్) వంటి శాస్త్రీయ పద్ధతుల ద్వారా మాత్రమే కచ్చితమైన, నమ్మదగిన అంచనా సాధ్యమవుతుంది.

5. గర్భిణీ మహిళలు ఇద్దరి కోసం తినాలా?     A woman should eat for two when pregnant

గర్భవతులుగా ఉన్నప్పుడు మహిళలు తమ క్యాలరీల తీసుకోవడాన్ని కొద్దిగా పెంచుకోవలసి రావచ్చు అనేది నిజమే అయినప్పటికీ, వారు అతిగా తినడం మానుకోవాలి. అతిగా తినడం వారికి మరియు పిండానికి హానికరం. ముఖ్యంగా ఆహారంలో శక్తిహీనమైన క్యాలరీలు ఎక్కువగా ఉన్నప్పుడు అది గర్భంలోని బిడ్డకు ప్రమాదకరమని గుర్తించాలి.

గర్భధారణ సమయంలో మహిళలు క్యాలరీలను క్రమంగా పెంచుకోవడానికి ప్రయత్నించాలి:

• మొదటి త్రైమాసికం: అదనపు క్యాలరీలు అవసరం లేదు.
• రెండవ త్రైమాసికం: నిపుణులు రోజుకు అదనంగా 340 క్యాలరీలను సిఫార్సు చేస్తున్నారు.
• మూడవ త్రైమాసికం: రోజుకు అదనంగా 450 క్యాలరీలు తీసుకోవాలని సిఫార్సు.

గర్భిణులు సాధారణంగా తమ రోజువారీ ఆహారాన్ని కొనసాగించడంపై దృష్టి పెట్టాలి, కానీ వారు పోషకాలు అధికంగా ఉండే ఆహారాన్ని తీసుకుంటున్నారని నిర్ధారించుకోవాలి.

6. గర్భవతులు వ్యాయామం చేయకూడదా?    A woman should avoid exercising when pregnant

చాలా మంది మహిళలు గర్భధారణ సమయంలో తేలికపాటి నుండి మధ్యస్థ వ్యాయామం చేయాలి. గర్భం దాల్చడానికి ముందు క్రమం తప్పకుండా వ్యాయామం చేయని మహిళ, కొత్త వ్యాయామ దినచర్యను ప్రారంభించే ముందు గైనకాలజిస్టుతో మాట్లాడాలి. క్రమం తప్పకుండా, మితమైన తీవ్రతతో చేసే వ్యాయామం సాధారణంగా తల్లి మరియు పిండం ఇద్దరికీ సురక్షితమైనది మరియు ప్రయోజనకరమైనది. ఈ వ్యాయామం బరువు పెరగడాన్ని నియంత్రించడానికి, మానసిక స్థితిని మెరుగుపరచడానికి, గర్భధారణ మధుమేహం మరియు అధిక రక్తపోటు వంటి సమస్యలను తగ్గించడానికి సహాయపడుతుంది.

ప్రసూతి వైద్య నిపుణులు, లేదా ప్రసవంలో నైపుణ్యం కలిగిన వైద్యులపై జరిపిన ఒక సర్వే ప్రకారం, గర్భం దాల్చడానికి ముందు శారీరక శ్రమ లేని మహిళలు కొత్త దినచర్యను ప్రారంభించాలని తాము సాధారణంగా సిఫార్సు చేయమని సగానికి పైగా ప్రతివాదులు చెప్పారు. అయితే, మొదటి త్రైమాసికంలో ఉన్న మహిళలకు వారానికి 2–5 రోజులు తేలికపాటి నుండి మధ్యస్థ ఏరోబిక్ వ్యాయామం చేయమని సిఫార్సు చేస్తున్నట్లు 97 శాతం మంది ప్రతివాదులు నివేదించారు. వారానికి 150 నిమిషాలు లక్ష్యంగా పెట్టుకుని వ్యాయామం చేయాలని సూచించారు. అధిక-ప్రమాదకరమైన, శారీరక స్పర్శతో కూడిన, లేదా అధిక ఎత్తులో చేసే కార్యకలాపాలను నివారించండి.

7. మార్నింగ్ సిక్‌నెస్ కేవలం ఉదయమే వస్తుందా?      Morning sickness only occurs in the morning

మార్నింగ్ సిక్‌నెస్ అనేది, దాని పేరుకు పూర్తి విరుద్ధంగా, ఒక సాధారణ అపోహ. మార్నింగ్ సిక్‌నెస్ ఉదయం మాత్రమే కాకుండా, పగలు లేదా రాత్రి ఏ సమయంలోనైనా సంభవించవచ్చు. గర్భధారణ సమయంలో వికారం మరియు వాంతులు హార్మోన్ల మార్పుల వల్ల కలుగుతాయి. అవి నిరంతరంగా ఉండవచ్చు లేదా యాదృచ్ఛికంగా రావచ్చు. కేవలం 2 శాతం మంది గర్భిణీ మహిళలలో మాత్రమే లక్షణాలు ఉదయానికే పరిమితమై ఉంటాయి. మార్నింగ్ సిక్‌నెస్ సాధారణంగా నాల్గవ వారంలో ప్రారంభమై 16వ వారానికి ముగుస్తుంది.

8. ఈ ఆహారాలతో గర్భిణీలలో అలర్జీ వస్తుందా?    Eating certain foods can cause an allergy to develop

ఒక నిర్దిష్ట ఆహారాన్ని తినడం వల్ల కొత్త అలెర్జీ వస్తుందనేది ఒక అపోహ. ఎందుకంటే అలెర్జీలు ప్రధానంగా రోగనిరోధక వ్యవస్థ లోపం, జన్యువులు మరియు పర్యావరణ కారకాల వల్ల వస్తాయి, కేవలం ఆహారం తీసుకోవడం వల్ల కాదు. ఒక ఆహారానికి నిరంతరం గురికావడం అరుదైన సందర్భాల్లో సెన్సిటైజేషన్‌ను ప్రేరేపించినప్పటికీ, ఒక వ్యక్తి కేవలం ఒక నిర్దిష్ట ఆహారాన్ని ఎక్కువగా తినడం వల్ల ఫుడ్ అలెర్జీని కలిగించుకోలేరు. గర్భిణీ మహిళలు, తమకు అలర్జీ లేనంత వరకు, నట్స్, పాలు వంటి అలర్జీలతో ముడిపడి ఉన్న ఆహారాలను తినవచ్చు. ఈ ఆహారాల వల్ల బిడ్డకు అలర్జీ రాదు. అయితే, ఇతర ఆరోగ్య కారణాల దృష్ట్యా వీరు పచ్చి మాంసం, సముద్రపు ఆహారం, సహా మెత్తని చీజ్‌ల వంటి కొన్ని రకాల ఆహార పదార్థాలను మానుకోవాలి. ఈ దశలో వారు ఏ ఆహార పదార్థాలను మానుకోవాలో అనే దానిపై వైద్య నిపుణులను మరింత సమాచారం అడిగి తెలుసుకోవాలి.

9. గర్భవతులు శృంగారానికి దూరంగా ఉండాలా?            A woman should avoid sex during pregnancy

ఆరోగ్యకరమైన గర్భధారణపై శృంగారం ఎలాంటి ప్రభావం చూపదు. సమస్యలు లేని గర్భధారణ సమయంలో శృంగారం సాధారణంగా సురక్షితమని అధ్యయనాలు స్పష్టం చేస్తున్నాయి. ఉమ్మనీరు, గర్భాశయ కండరాలు మరియు శ్లేష్మ పొర ద్వారా శిశువు బాగా రక్షించబడుతుంది. ఈ సమయంలో సంభోగం శిశువుకు హాని కలిగించదు లేదా గర్భస్రావానికి కారణం కాదని వెల్లడిస్తున్నాయి. అయినప్పటికీ కొన్ని అధిక-ప్రమాద పరిస్థితులలో దీనికి దూరంగా ఉండటం అవసరం కావచ్చు. ఇప్పటికే ఉన్న పరిశోధనల సమీక్షలు, తక్కువ ప్రమాదం ఉన్న గర్భాలలో గర్భధారణ సమయంలో శృంగారం చేయడం వల్ల నెలలు నిండక ముందే ప్రసవం అయ్యే ప్రమాదం పెరగదని నిర్ధారించారు.

ఇతర సంభావ్య సమస్యలు ఇంకా నిరూపించబడలేదని కూడా వారు పేర్కొన్నారు. అరుదైన సందర్భాలలో, గర్భధారణ సమయంలో శృంగారానికి దూరంగా ఉండమని వైద్యులు సిఫార్సు చేస్తారు. ఉదాహరణకు, గర్భధారణ సమయంలో అధిక రక్తస్రావం జరిగినా లేదా ఉమ్మనీరు పోయినా, మహిళ శృంగారానికి దూరంగా ఉండాలి. ప్లాసెంటల్ సమస్యలు, గర్భాశయ ముఖద్వార బలహీనత, లేదా నెలలు నిండక ముందే ప్రసవం అయ్యే అవకాశాన్ని పెంచే ఏవైనా ఇతర కారణాలను ఎదుర్కొంటున్న మహిళలు శృంగారంలో పాల్గొనడానికి ముందు వైద్యుడిని సంప్రదించాలి.

10. గర్భిణులు పిల్లుల జోలికి వెళ్లకూడదా?.     Cats are off limits

పిల్లులు.. ముఖ్యంగా ఇంట్లో పెంచుకునే పెంపుడు పిల్లులను గర్భిణులు దూరంగా ఉంచాలి. మరో రకంగా చెప్పాలంటే వాటిని అంటరానివిగా పరిగణించాలి అనేది కూడా ఒక పెద్ద అపోహ. పిల్లులు స్వతంత్రంగా ఉన్నప్పటికీ, అవి ప్రేమగల, సామాజిక జంతువులు. ఇవి మనుషులతో బలమైన బంధాలను ఏర్పరుచుకుని, వారితో తరచుగా సాంగత్యాన్ని కోరుకుంటాయి. అయితే పిల్లుల వల్ల ఇన్ఫెక్షన్ వస్తుందని బలమైన కారణాల వల్ల, చాలా మంది మహిళలు గర్భధారణ సమయంలో పిల్లులను ఇంట్లోకి రానీవ్వరు. పెంపుడు పిల్లలను కూడా దూరంగా ఉంచడం వంటి చర్యలకు పూనుకుంటారు. వాటితో సంబంధం పెట్టుకోకుండా ఉండేందుకు ప్రయత్నిస్తారు. పిల్లి మలంలో టాక్సోప్లాస్మోసిస్ అనే హానికరమైన వ్యాధి ఉండవచ్చు. అందువల్ల, ముందుజాగ్రత్తగా ఉండటానికి, గర్భిణీ మహిళ లిట్టర్‌ను మార్చేటప్పుడు గ్లౌజులు ధరించాలి లేదా వేరొకరితో ఆ పని చేయించాలి. ఈ జాగ్రత్తను పాటించినంత కాలం, గర్భధారణ సమయంలో మహిళలు పిల్లులకు దూరంగా ఉండాల్సిన అవసరం లేదు.

11. గర్భిణులు కాఫీ తాగకూడదా?  A woman cannot drink coffee during pregnancy

గర్భిణులు కాఫీ తాగకూడదు, దీని వల్ల పిండం ఆరోగ్యం దెబ్బతింటుందన్న బలమైన అపోహ ఒకటి ఉంది. కానీ గర్భవతిగా ఉన్నప్పుడు మహిళలు ప్రతిరోజూ ఒక కప్పు కాఫీ తాగడం సురక్షితం. అయితే కాఫీలో వారు తీసుకునే కెఫిన్ పరిమాణాన్ని 200 మిల్లీగ్రాములు లేదా అంతకంటే తక్కువకు పరిమితం చేసుకోవాలి. ఈ పరిమాణం సుమారు 1.5 కప్పుల కాఫీకి సమానం, ఇక్కడ ఒక కప్పు అంటే 8 ఔన్సులు.

అమెరికన్ కాలేజ్ ఆఫ్ అబ్స్టెట్రిషియన్స్ అండ్ గైనకాలజిస్ట్స్ (ACOG)తో సహా చాలా నిపుణుల సంస్థలు, మితమైన కెఫిన్ వినియోగం వల్ల గర్భస్రావం లేదా నెలలు నిండక ముందే ప్రసవం జరగడానికి కారణం కాదని పేర్కొన్నాయి. కాగా, కెఫిన్ ఉత్తేజపరిచే పదార్థం కాబట్టి, పరిమితిని మించి తీసుకోవడం వల్ల ఇది శిశువు రక్తప్రవాహంలోకి వెళ్లే ప్రమాదం ఉంది. దీనిని అధికంగా తీసుకోవడం (రోజుకు 200–300 మిల్లీగ్రాములకు మించి) తీసుకోవడం వల్ల శిశువులు తక్కువ బరువుతో జన్మించడం, గర్భస్రావం మరియు పిండం పెరుగుదల పరిమితి వంటి ప్రమాదాలను పెంచుతుందని తేలింది.

12. గర్భిణులు ఎల్లప్పుడూ కాంతివంతంగా ఉంటారా?    A woman will be happy and glowing all the time

గర్భధారణ సమయంలో ఒక మహిళ ఎల్లప్పుడూ సంతోషంగా, కాంతివంతంగా ఉంటుందనేది ఒక అపోహ. చాలా మంది గర్భిణీ మహిళలకు గర్భధారణ కష్టంగా ఉంటుంది. హార్మోన్ల మార్పులు మరియు పెరిగిన రక్త ప్రసరణ “గర్భధారణ కాంతి”కి కారణం, అయినప్పటికీ, తీవ్రమైన శారీరక మరియు మానసిక మార్పుల కారణంగా చాలా మంది మహిళలు అలసట, మొటిమలు, లేదా మానసిక కల్లోలాలను అనుభవిస్తారు. ఫలితంగా ఇవి శారీరక మరియు మానసిక ఆరోగ్యంపై ప్రభావం చూపుతాయి, అలాగే ఒక మహిళ యొక్క మానసిక స్థితిని కూడా ప్రభావితం చేస్తాయి. ప్రజలు ఎల్లప్పుడూ సంతోషంగా ఉండకపోవడం సహజం, గర్భిణీ మహిళలు కూడా దీనికి మినహాయింపు కాదు.

13. సిజేరియన్ తర్వాత సాధారణ ప్రసవం సాధ్యమా?   Normal delivery is not possible after a cesarean

గర్భిణీ మహిళలకు తొలి కాన్పు సిజేరియన్ అయితే ఆతర్వాత యోని ద్వారా ప్రసవం అసాధ్యం అనేది మహిళా లోకంలో బలంగా వినబడుతోంది. అయితే నిజానికి ఇది ఒక పెద్ద అపోహ. చాలా మంది మహిళలు సిజేరియన్ తర్వాత యోని ద్వారా ప్రసవాన్ని (VBAC) సురక్షితంగా పొందవచ్చు. అమెరికన్ కాలేజ్ ఆఫ్ అబ్స్టెట్రిషియన్స్ అండ్ గైనకాలజిస్ట్స్ (ACOG) ప్రకారం, సిజేరియన్ తర్వాత ప్రసవ ప్రయత్నం (TOLAC) చాలా మందికి సురక్షితమైన ఎంపిక. ఇది 60–80 శాతం వరకు సక్సెస్ రేటు కలిగి ఉంది. అయితే సిజేరియన్ ద్వారా లేదా యోని ద్వారా ప్రసవించాలనే నిర్ణయం, ప్రస్తుత గర్భం ఎలా సాగుతోంది అనేది దానిపై ఆధారపడి ఉంటుంది. దీంతో పాటు గర్భిణి యొక్క ప్రసవ వేదన, మరియు ఏవైనా సంభావ్య సమస్యల ప్రమాదంపై ఆధారపడి ఉంటుంది.

14. ప్రసవ వేదన ప్రేరేపించే ఆహారాలు Certain foods and drinks can bring on labor

చాలా ఆహారాలు, పానీయాలు ప్రసవ వేదనను ప్రేరేపిస్తాయని మరో అపోహ కూడా ఉంది. ఈ ఆహారాల జాబితాలో ఘాటుగా ఉండే మసాలా ఆహారాలుతో పాటు అనాస పండు, ఆముదం, మరియు లైకోరైస్ వంటివి ఉన్నాయి. అయితే ఇవన్నీ ప్రసవ వేదనను ప్రేరేపిస్తాయన్నది పూర్తిగా అపోహ మాత్రమే. ఎందుకంటే అవి ప్రసవాన్ని ప్రేరేపిస్తాయని ఎటువంటి శాస్త్రీయ ఆధారాలు ఇప్పటివరకు లభించ లేదు. కాగా,  కారంగా ఉండే ఆహారం వంటి కొన్ని పదార్థాలు జీర్ణాశయ సంబంధిత చికాకును కలిగించి సంకోచాలను ప్రేరేపించవచ్చు, కానీ అవి తరచుగా గుండెల్లో మంట, అజీర్ణం, లేదా విరేచనాలకు మాత్రమే దారితీస్తాయి. 2018లో జరిగిన ఒక అధ్యయనంలో కొన్ని మూలికా మందులు ప్రభావవంతంగా ఉండవచ్చని కనుగొనబడింది.

అయితే, ప్రసవ వేదనను ప్రేరేపించడానికి ప్రజలు ఉపయోగించే ప్రసిద్ధ సహజ పద్ధతులు భద్రత విషయంలో విభిన్నంగా ఉంటాయి:

• బ్లూ మరియు బ్లాక్ కోహోష్: ఈ వేర్లు పిండం యొక్క గుండె వైఫల్యం మరియు పక్షవాతానికి, అలాగే ప్రసవ సమయంలో తల్లికి సమస్యలకు కారణం కావచ్చని సూచించే ఆధారాలు ఉన్నాయి.
• అనాస పండు: అనాస పండు తినడం వల్ల ఎలాంటి హాని లేదు, కానీ అది గుండెల్లో మంటను కలిగించవచ్చు.
• ఆముదం నూనె: ఈ నూనె గర్భాశయ చికాకు మరియు సంకోచాలను కలిగించవచ్చు, కానీ ఇవి తరచుగా ప్రసవ నొప్పుల వల్ల కాకుండా విరేచనాల ఫలితంగా సంభవిస్తాయి.
• మసాలా ఆహారాలు: మసాలా ఆహారాలు తినడం వల్ల ప్రసవం ప్రేరేపించబడుతుందని ఎటువంటి రుజువు లేదు. అయితే, అవి జీర్ణాశయ సంబంధిత సమస్యలు మరియు గుండెల్లో మంటను కలిగించవచ్చు.

ఫుడ్ అండ్ డ్రగ్ అడ్మినిస్ట్రేషన్ (FDA) వారు సాధారణ మందులను అంచనా వేసే విధంగా మూలికా మందులను నియంత్రించరు. ఫలితంగా, ప్రజలు వాటి వాడకం గురించి ఆరోగ్య సంరక్షణ నిపుణులతో చర్చించాలి.

చివరిగా.!

ప్రతి గర్భధారణ దానిని అనుభవిస్తున్న వ్యక్తి వలె ప్రత్యేకమైనది. ఈ అపోహలలో చాలా వరకు – పెళ్లి ఉంగరాన్ని బట్టి మీ బిడ్డ లింగాన్ని ఊహించడం వంటివి – హానిచేయని సరదాగా ఉన్నప్పటికీ, మరికొన్ని అనవసరమైన ఆందోళనను సృష్టించవచ్చు లేదా మీకు లేదా బిడ్డకు వాస్తవంగా ప్రయోజనం చేకూర్చని నిర్బంధ అలవాట్లకు దారితీయవచ్చు. ఈ తొమ్మిది నెలలను ఎదుర్కోవడానికి ఉత్తమ మార్గం “ఇంటర్నెట్ జ్ఞానం” పట్ల ఆరోగ్యకరమైన సందేహంతో ఉండటం. మీలో ఉత్పన్నమయ్యే సందేహాలు, పెద్దవారు పెట్టే ఆంక్షల విషయంలో అనుమానాలను మీ వైద్య నిపుణులతో చర్చించి సరైన దిశగా అడుగులు వేయడం ఉత్తమం. గర్భిణిలు వారి శరీరాన్ని నమ్మాలి, శాస్త్రాన్ని అనుసరించాలని గుర్తంచుకోవాలి. ఇక “ఇద్దరి కోసం తినడం” అనే కారణంతో అతిగా తినవలసిన అవసరం లేదు. గర్భధారణ చుట్టూ అనేక అపోహలు అలుముకున్నా, వాటిలో కొన్ని తప్పుడు లేదా హానికరమైనవి కూడా ఉండవచ్చు. గర్భధారణ సమయంలో ఏదైనా ముఖ్యమైన ఆహార, ఆరోగ్య, లేదా జీవనశైలి మార్పులు చేసే ముందు మీ గైనకాలజిస్టుతో మాట్లాడండి.