ప్రపంచ వ్యాప్తంగా కోరలు చాచుతున్న అనేక వ్యాధులు మానవాళిని మనుగడను ప్రశ్నార్ధంగా మారుస్తున్నాయి. వ్యాధుల బారిన పడుతూ, లేస్తూ.. తట్టుకుని వృద్దాప్య దశకు రాగానే అక్కడ అనేక వ్యాధులు తిష్టవేసుకుని కూర్చున్నాయి. వాటిలో అల్జీమర్స్ అనే మహమ్మారి ఒకటి. మతిమరపు వ్యాధిగా మనం చెప్పుకుంటాం, కానీ నిజానికి ఇది అంతకన్నా ఎక్కువ. ప్రపంచవ్యాప్తంగా ఏకంగా ఐదు కోట్ల యాభై లక్షల మంది వయోజనులను ఇది ప్రభావితం చేస్తుందని రానున్న మరో పదిహేనేళ్లలో ఈ సంఖ్య రెట్టింపుకు చేరుతుందని వైద్యపరిశోధకుల అంచనా. ఫిన్ లాండ్ అనే దేశంలో ఈ సంఖ్య మరీ ఎక్కువగా ఉందని, ప్రతీ ఇద్దరు వయోజనులలో ఒకరు ఈ వ్యాధి భారిన పడుతున్నారని గణంకాలు చెబుతున్నాయి. అగ్రరాజ్యం అమెరికాలో 69 లక్షల మంది ఈ వ్యాధి భారిన పడ్డారని, అదే సమయంలో మన దేశం భారత్ లోనూ 88 లక్షల మంది ఈ వ్యాధిగ్రస్తులు ఉన్నారని వైద్యుల అంచనా.
మునుపటి అధ్యయనాలు ఏం చెబుతున్నాయి? What do previous studies say?
అల్జీమర్స్ మరియు ఇతర రకాల డిమెన్షియా ప్రమాదాన్ని తగ్గించడానికి వైద్య పరిశోధకులు చేసే ప్రయత్నాలు సఫలీకృతమయ్యే దిశగా సాగుతున్నాయి. ఈ క్రమంలో డిమెన్షియా ప్రమాదాన్ని తగ్గించడానికి మరో కొత్త రకం వాక్సీన్ ను తీసుకువచ్చేందుకు బదులు.. ప్రస్తుతానికి వాడుకలో ఉన్న వ్యాక్సిన్లను ఈ దిశగా ఉపయోగించాలన్న అలోచనలు పునాది వేశాయి. ఆ దిశగా సాగిన పరిశోధన ప్రయత్నాలు ముందడుగు వేస్తున్నాయి. ఇప్పటికే వాడుకలో ఉన్న వ్యాక్సిన్ అధిక మోతాదు తీసుకోవడంతో అల్జీమర్స్ వ్యాధి ప్రభావాన్ని తగ్గించవచ్చని వైద్య పరిశోధకులు చేస్తున్న ప్రయత్నాలు సత్ఫలితాలు ఇస్తున్నాయి. అదే ఇన్ఫ్లుఎంజా వ్యాక్సిన్. ఇది ఒక వ్యక్తికి డిమెన్షియా వచ్చే ప్రమాదాన్ని తగ్గించడంలో సహాయపడగలదని మునుపటి అధ్యయనాలు చూపిస్తున్నాయి.
ఇక తాజాగా కొత్త అధ్యయన ఫలితాలు దీనిని సమర్ధిస్తూనే.. సాధారణ వ్యాక్సిన్ డోస్ తీసుకున్న వారితో పోలిస్తే, అధిక-మోతాదు ఇన్ఫ్లుఎంజా వ్యాక్సిన్ తీసుకున్న వృద్ధులలో అల్జీమర్స్ వ్యాధి ప్రమాదం ఎక్కువగా తగ్గుతుందని కనుగొంది. అల్జీమర్స్ వ్యాధి మరియు ఇతర రకాల డిమెన్షియా ప్రమాదాన్ని తగ్గించడానికి పరిశోధకులు కొత్త మార్గాలను కనుగొంటూన్నారు. కొందరు ఇతర వ్యాధుల ప్రమాదాన్ని తగ్గించడానికి ఇప్పటికే వాడుకలో ఉన్న వ్యాక్సిన్లను పరిశీలిస్తున్నారు. ఉదాహరణకు, డిసెంబర్ 2025లో ప్రచురించబడిన ఒక అధ్యయనం ప్రకారం, షింగిల్స్ వ్యాక్సిన్ ఒక వ్యక్తికి డిమెన్షియా వచ్చే ప్రమాదాన్ని తగ్గించడంలో, అలాగే వ్యాధి పురోగతిని నెమ్మదింపజేయడంలో సహాయపడగలదని కనుగొనింది.
ప్రచురితమైన ఇతర పరిశోధనల ప్రకారం, టెటానస్ మరియు డిఫ్తీరియా (Tdap/Td) వ్యాక్సిన్, న్యుమోనియా కోసం న్యుమోకాకల్ వ్యాక్సిన్ వంటివి వ్యాధి, వ్యాధి లక్షణాలపై ప్రభావం చూపుతున్నాయి. ఈ తరహాలోనే ఫ్లూ కోసం ఇన్ఫ్లుయెంజా వ్యాక్సిన్ వంటివి ఒక వ్యక్తిలో అల్జీమర్స్ వ్యాధి మరియు డిమెన్షియా ప్రమాదాన్ని తగ్గించడంలో కూడా సహాయపడతాయని తెలుస్తోంది. ఇప్పుడు ‘న్యూరాలజీ’ జర్నల్లో ప్రచురితమైన ఒక కొత్త అధ్యయనం ప్రకారం, ప్రామాణిక వ్యాక్సిన్ మోతాదును తీసుకునే వారితో పోలిస్తే, అధిక-మోతాదు ఇన్ఫ్లుయెంజా వ్యాక్సిన్ తీసుకునే వృద్ధులలో అల్జీమర్స్ వ్యాధి ప్రమాదం ఎక్కువగా తగ్గే అవకాశం ఉందని తెలుస్తోంది.
ఫ్లూ వ్యాక్సిన్ అల్జీమర్స్ ను ఎలా ప్రభావితం చేస్తుంది? How does flu vaccine affect Alzheimer’s risk?
ఈ అధ్యయనానికి ప్రధాన రచయిత, యూటీహెల్త్ హ్యూస్టన్లోని ప్రొఫెసర్, న్యూరాలజిస్ట్ అయిన డాక్టర్ పాల్ షుల్జ్, వివరిస్తూ, ఈ కొత్త అధ్యయనం, 2022లో ఆయన మరియు ఆయన సహోద్యోగులు ప్రచురించిన ఒక అధ్యయనంతో సహా, మునుపటి పరిశోధనలకు కొనసాగింపు అని తెలిపారు. 2022 నాటి అధ్యయనం ప్రకారం, సంవత్సరానికి ఆరుసార్లు ఇన్ఫ్లుయెంజా వ్యాక్సిన్ తీసుకోవడం ద్వారా అల్జీమర్స్ వ్యాధి ప్రమాదాన్ని 40 శాతం వరకు తగ్గించవచ్చని కనుగొనబడింది. కాగా, ఈ అధ్యయనాల తర్వాత ‘ఆరోగ్యకరమైన మనుగడ ప్రభావం’ లేదా ‘ఆరోగ్యకరమైన టీకా గ్రహీత ప్రభావం’ కారణంగా వచ్చిన తప్పుడు ఫలితమా లేక నిజమైన ఫలితమా అనే ప్రశ్న తమను తీవ్రంగా వేధించిందని చెప్పారు.
టీకాలు వేయించుకున్న వారు సాధారణంగా ఆరోగ్యకరమైన జీవనశైలిని కలిగి ఉండవచ్చునని అన్నారు. వారు టీకాలు వేయించుకున్నట్లే, వ్యాయామం చేయడం, రక్తపోటు మరియు కొలెస్ట్రాల్ మందులు తీసుకోవడం, క్రమం తప్పకుండా వైద్యులను కలవడం, ఆరోగ్యకరమైన ఆహారం తినడం వంటివి చేస్తుంటారుని డాక్టర్ పాల్ షుల్జ్ చెప్పుకోచ్చారు. అదే సమయంలో తాము సాధించిన ఫలితాలపై యాదృచ్ఛికంగా, హ్యూస్టన్ ప్రజారోగ్య శాఖలో ఒక ఉపన్యాసం ఇవ్వాల్సి వచ్చిందని అన్నారు. అప్పుడు అక్కడ మోతాదుపై ఆధారపడిన ప్రభావం ఏమైనా ఉందా అన్న ప్రశ్న వినబడిందని ఆయన కొనసాగించారు. అయితే సాధారణంగా వయసు పెరిగేకొద్దీ వయోజనుల రోగనిరోధక వ్యవస్థలు తక్కువ ప్రతిస్పందన చూపుతాయని తనకు తెలుసునని అన్నారు.
కానీ, 65 ఏళ్లు పైబడిన వారికి ప్రామాణిక టీకా కంటే నాలుగు రెట్లు ఎక్కువ శక్తివంతమైన టీకా ఇస్తారన్న విషయం మాత్రం తనకు తెలియదని చెప్పుకోచ్చారు. అయితే, 65 ఏళ్లు పైబడిన ప్రతి ఒక్కరూ అధిక మోతాదు ఇన్ఫ్లుయెంజా టీకా తీసుకోరని తేలింది. ఆరోగ్య శాఖ, ఫార్మసీలలో అధిక మోతాదు టీకాల కొరత ఉండవచ్చు, లేదా మరేదో కారణంతో అవి అయిపోయే ఘటనలు, మొదలైనవి కూడా చోటు చేసుకోవచ్చునని డాక్టర్ షుల్జ్ అన్నారు. అధిక మోతాదు లేదా తక్కువ మోతాదు అయినా, టీకాలు వేయించుకున్న వారిని మాత్రమే చేర్చుకున్నప్పుడు, అల్జీమర్స్ వ్యాధి ప్రమాదాన్ని తగ్గించడంలో టీకా యొక్క రక్షణ ప్రభావం ఇంకా ఉందా లేదా అని పరీక్షించడమే లక్ష్యంగా పెట్టుకుని తమ పరిశోధన కొనసాగిందని ఆయన జోడించారు.
మహిళల్లో అధిక మోతాదు రక్షణ ప్రభావం అధికం High-dose protective effect stronger in women
65 ఏళ్లు మరియు అంతకంటే ఎక్కువ వయస్సు ఉన్న సుమారు 200,000 మంది పాల్గొన్నవారి ఆరోగ్య డేటాను విశ్లేషించిన తర్వాత, అధిక మోతాదు ఇన్ఫ్లుయెంజా వ్యాక్సిన్ తీసుకున్నవారు తమ అల్జీమర్స్ వ్యాధి ప్రమాదాన్ని సుమారు 55 శాతం తగ్గించుకున్నారని పరిశోధకులు కనుగొన్నారు. అదే ప్రామాణిక వ్యాక్సిన్ మోతాదు తీసుకున్నవారిలో ఈ ప్రమాదం 40 శాతంగా ఉంది. అదనంగా, అధిక మోతాదు ఫ్లూ వ్యాక్సిన్ యొక్క రక్షణ ప్రభావం పురుషుల కంటే మహిళల్లో బలంగా ఉందని శాస్త్రవేత్తలు నివేదించారు. అది ఎందుకో మాకు తెలియదు, కానీ మహిళలు మరియు పురుషుల రోగనిరోధక వ్యవస్థలు చాలా భిన్నంగా ఉంటాయని మాకు తెలుసునని షుల్జ్ అన్నారు.
పురుషులకు బలమైన సహజ రోగనిరోధక ప్రతిస్పందన (వ్యాధికారకాలను మొదటిసారి చూసినప్పుడే వాటిని అపరిచితమైనవిగా గుర్తించడం) ఉంటుంది. కానీ మహిళలకు బలమైన యాంటీబాడీ-మధ్యవర్తిత్వ ప్రతిస్పందన ఉంటుంది. వాస్తవానికి, మనం గురయ్యే వ్యాధికారకాలకు అతుక్కోవడానికి సిద్ధంగా ఉండే యాంటీబాడీలను తయారు చేయడం ద్వారా వ్యాక్సిన్లు పనిచేస్తాయని ఆయన తెలిపారు. ఈ యాంటీబాడీ ప్రతిస్పందనతోనే వ్యాధులను నిరోధించేందుకు తమ ప్రయత్నాలు సాగుతాయని ఆయన కొనసాగించారు. కాబట్టి, మహిళల్లో రోగనిరోధక ప్రతిస్పందన మరింత బలంగా ఉండవచ్చు. అల్జీమర్స్ వ్యాధిలో మెదడు కణాలు ఎలా నశించిపోతాయనే దానిలో రోగనిరోధక చర్యకు సంబంధం ఉంది. అందువల్ల, టీకాలకు మరింత బలమైన రోగనిరోధక ప్రతిస్పందన ఉండటం వల్ల మహిళల్లో టీకాల ప్రభావం ఎక్కువగా ఉండవచ్చునని పాల్ షుల్జ్ చెప్పుకొచ్చారు.
అల్జీమర్స్ తగ్గించడంలో ఫ్లూ టీకా సహాయపడుతుందా? How flu vaccine help lower Alzheimer’s risk?
ఫ్లూ టీకా ఒక వ్యక్తికి అల్జీమర్స్ వ్యాధి వచ్చే ప్రమాదాన్ని తగ్గించడంలో ఎలా సహాయపడగలదనే దానిపై ప్రశ్నలు మిగిలి ఉన్నాయి. కాలిఫోర్నియా ఐర్విన్ లోని మెమోరియల్ కేర్ మెడికల్ గ్రూప్ లో అంతర్గత వైద్య నిపుణుడిగా, హెల్తీ బ్రెయిన్ క్లినిక్ కు ప్రధాన వైద్య అధికారిగా వ్యవహరిస్తున్న డాక్టర్ డంగ్ ట్రిన్హ్, దీనికి సంబంధించి జీవశాస్త్రపరంగా సమంజసమైన కొన్ని అవకాశాలు ఉన్నాయని తెలిపారు. మొదటిగా, వృద్ధులలో సాధారణ మోతాదులో ఇచ్చే టీకాల కంటే అధిక మోతాదులో ఇచ్చే ఇన్ఫ్లుయెంజా టీకాలు మరింత బలమైన రోగనిరోధక ప్రతిస్పందనను ప్రేరేపిస్తాయి. తద్వారా ఇన్ఫ్లుయెంజా సంక్రమణ వచ్చే అవకాశాన్ని లేదా దాని తీవ్రతను, అలాగే దానితో పాటు వచ్చే శరీరవ్యాప్త వాపును (systemic inflammation) అవి తగ్గించవచ్చునని డాక్టర్ ట్రిన్హ్ వివరించారు.
అల్జీమర్స్ వ్యాధిలో దీర్ఘకాలిక వాపు మరియు న్యూరోఇన్ఫ్లమేషన్ పాత్ర పోషిస్తాయని భావిస్తున్నందున, కాలక్రమేణా వాపు ఒత్తిడిని తగ్గించడం ఒక మార్గం కావచ్చునని ఆయన ఊహించారు. రెండవది, కొన్ని వ్యాక్సిన్లు రోగనిరోధక వ్యవస్థకు ‘శిక్షణ’ ఇవ్వగలవని లేదా దానిని నియంత్రించగలవని అన్నారు. తద్వారా మెదడు ఆరోగ్యంపై విస్తృతంగా ప్రభావం చూపగలవని అనే ఆలోచనపై ఆసక్తి పెరుగుతోంది, అయినా ఇప్పటికీ అది ఇంకా సైద్ధాంతికంగానే ఉందని ఆయన చెప్పుకొచ్చారు. ముఖ్యమైన విషయం ఏమిటంటే, ఈ అధ్యయనం ఆ యంత్రాంగాన్ని నిరూపించదని అయన అన్నారు. కాగా ఇది ఒక విశ్వసనీయమైన ఊహను లేవనెత్తుతుందని, అదేమిటంటే, ఇన్ఫెక్షన్కు వ్యతిరేకంగా బలమైన రక్షణ, బలమైన రోగనిరోధక ప్రేరణ, లేదా ఈ రెండూ అల్జీమర్స్ ప్రమాదాన్ని తగ్గించడానికి దోహదపడవచ్చునని ట్రిన్హ్ అన్నారు.
ఆశాజనకమైన ఫలితాలు, ఇంకా పరిశోధన అవసరం Promising findings with more research needed
ఫ్లూ టీకాతో అల్జిమర్స్ వ్యాధి ప్రభావం తగ్గుతుందన్న ఈ కొత్త అధ్యయనం యొక్క ఫలితాల పట్ల తాను ఉత్సాహంగా ఉన్నానని డాక్టర్ రెహాన్ అజీజ్ వ్యాఖ్యానించారు. న్యూజెర్సీలోని హ్యాకెన్సాక్ మెరిడియన్ స్కూల్ ఆఫ్ మెడిసిన్లో సైకియాట్రీ మరియు న్యూరాలజీ అసోసియేట్ ప్రొఫెసర్ గా సేవలందిస్తున్న ఆయన షింగిల్స్ వ్యాక్సిన్ అల్జీమర్స్ డిమెన్షియా ప్రమాదాన్ని తగ్గించవచ్చని సూచించే బలమైన డేటా ఇప్పటికే తమ వద్ద ఉందని ఆయన చెప్పుకొచ్చారు. ఈ కొత్త అధ్యయనం ఫ్లూ వ్యాక్సిన్ కూడా అదే విధమైన రక్షణ ప్రయోజనాన్ని అందించగలదని సూచిస్తోందని అధ్యయనం వివరించడం పట్ల ఆయన సంతృప్తి వ్యక్తం చేశారు.
తన వైద్య వృత్తిలో, తాను వృద్ధులకు షింగిల్స్ వ్యాక్సిన్ను దాని ప్రాథమిక ప్రయోజనం కోసం మాత్రమే కాకుండా, దాని వల్ల కలిగే సంభావ్య జ్ఞాన సంబంధిత ప్రయోజనం కోసం కూడా సిఫార్సు చేస్తానని చెప్పారు. ఇప్పుడు, అదే తర్కాన్ని వార్షిక ఫ్లూ షాట్కు కూడా విస్తరించవచ్చునని ఆయన తెలిపారు. అంతేకాకుండా, ఈ అధ్యయనం ప్రత్యేకంగా అధిక-మోతాదు ఫ్లూ వ్యాక్సిన్ను సిఫార్సు చేయడానికి బలమైన వైద్యపరమైన కారణాన్ని అందిస్తుందని అన్నారు. అదేమిటంటే ప్రామాణిక-మోతాదు వెర్షన్తో పోలిస్తే అల్జీమర్స్ ప్రమాదాన్ని ఎక్కువగా తగ్గిస్తుందని నిరూపించిందని ఆయన జోడించారు.
తాజా అధ్యయన ఫలితాలు ఆశాజనకంగా ఉన్నాయని డాక్టర్ పీటర్ గ్లీబస్ పేర్కొన్నారు. దక్షిణ ఫ్లోరిడాలోని మార్కస్ న్యూరోసైన్స్ ఇన్స్టిట్యూట్ న్యూరాలజీ విభాగాధిపతిగా, కాగ్నిటివ్ అండ్ బిహేవియరల్ న్యూరాలజీ డైరెక్టర్ గా సేవలందిస్తున్న ఆయన తాజా అధ్యయనంపై తన అభిప్రాయాలను వ్యక్తపర్చారు. అయితే, తక్కువ కాలం పాటు పరిశీలన జరపడం మరియు క్లెయిమ్స్ డేటాపై ఆధారపడటం వంటి అధ్యయన పరిమితుల కారణంగా, ఈ ఫలితాలను జాగ్రత్తగా అర్థం చేసుకోవాలని అన్నారు. ఈ ఫలితాలను నిర్ధారించడానికి మరియు ఇందులో ఇమిడి ఉన్న యంత్రాంగాలను అర్థం చేసుకోవడానికి మరింత పరిశోధన అవసరమని ఆయన తెలిపారు.
ఇక ముందు జరిగే అధ్యయనాలు, లేదా పరిశోధనలు సుదీర్ఘకాలం పాటు పరిశీలన జరిపడం ఉత్తమం అని ఆయన చెప్పుకొచ్చారు. అధ్యయనాలు, యాదృచ్ఛిక నియంత్రిత పరీక్షలు, మరియు అధిక మోతాదు ఇన్ఫ్లుయెంజా వ్యాక్సిన్ల రక్షణాత్మక ప్రభావాల వెనుక ఉన్న జీవసంబంధ యంత్రాంగాలపై పరిశోధనలు ఉండాలని ఆయన అన్నారు. ఈ దిశగా సాగిన పరిశోధనలపై వైద్యులు, అధికంగా ఆధారపడే వీలు ఉంటుందని ఆయన వివరించారు. అంతేకాదు ఒకే సమూహంపై కాకుండా వైవిధ్యభరితమైన జనాభాపై కూడా అధ్యయనాలు దృష్టి సారించాలని తెలిపారు. బయోమార్కర్ల సమాచారాన్ని చేర్చుకోవాలి మరియు అభిజ్ఞా క్షీణత పురోగతిపై టీకా ప్రభావాన్ని అన్వేషించాలని డాక్టర్ పీటర్ గ్లీబస్ తన అభిప్రాయాలను పంచుకున్నారు.
చివరిగా.!
ఫ్లూ టీకాకు, అల్జీమర్స్ ప్రమాదాన్ని తగ్గించడానికి మధ్య సంబంధాన్ని తెలిపే ఆధారాలు పెరగడం, మనం నివారణ వైద్యం గురించి చూసే విధానంలో ఒక ముఖ్యమైన మార్పును సూచిస్తుంది. ఇది కేవలం జ్వరంతో వారం రోజులు మంచాన పడకుండా ఉండటం గురించి మాత్రమే కాదు, ఇది న్యూరోఇన్ఫ్లమేషన్ అనే నిశ్శబ్ద ప్రక్రియల నుండి మెదడును బలోపేతం చేయడం గురించి. మనం 2026లోకి అడుగుపెడుతున్న కొద్దీ, పటిష్టమైన టీకాల షెడ్యూల్ను పాటించాల్సిన అవసరం ఉంది. ముఖ్యంగా వృద్ధులకు అధిక మోతాదులో ఫ్లూ టీకాలు వేయడం వల్ల అభిజ్ఞా సామర్థ్యాన్ని పెంచడానికి అత్యంత అందుబాటు మరియు ప్రభావవంతమైన వ్యూహాలలో ఒకటి అని డేటా సూచిస్తుంది. దీనికి కారణమయ్యే మార్గాలను పూర్తిగా గుర్తించడానికి మరింత పరిశోధన అవసరం.
